Këmbët i ka goxha keq, por Blerim Xhela, përkundër problemeve shëndetësorë thotë që nuk do dal nga miniera pa u plotësuar kërkesat.
Megjithatë, Xhela tregon që janë lodhur shumë këto dhjetë ditë ngujimi në 800 metra nëntokë.
“Vallahin jemi lodhë shumë, shumë jemi lodhë, prej që sidomos prej këmbëve llom jemi bo”, thotë ai.
Gjendjen shëndetësore, jo të mirë e ka edhe minatori Blerim Haxha, por edhe ky thotë që nuk do dorëzohen.
“Gjendjen e kemi të vështirë, shumë të vështirë. Çdo ditë qesim kolegë për me i çu te mjeku”, deklaron Haxha.
E vetëm gjatë së enjtes ndihmë mjekësore kërkuan 16 minatorë.
“Sot i kemi pasë 16 raste edhe ata i kemi trajtu me terapi nëse ka pasë nevojë. Disa kanë qenë për shkak të tensionit të rritur, disa kokëdhimbje, disa lodhje”, bën të ditur Ridvan Ramagjiku nga QKMF.
Për gjendjen e punëtorëve të Trepçës ka reaguar edhe Shoqata e Minatorëve Pensionist të Kosovës.
“Është fatkeqësi shumë e madhe mas 25 viteve me ardhë deri te kjo. Këtë e bëjnë njerëzit e pandërgjegjshëm. Me emër të minatorëve dhe me punu kundër minatorëve i ndodhë vetëm këtij menaxhmenti dhe kërkujt tjetër”, u shpreh Bedri Bunjaku nga Shoqata e minatorëve pensionistë.
Minatorët grevistë po kërkojnë, shkarkimin e u.d kryeshefit të Trepçës, Enis Abdurrahmani, realizimin e pagës nga data 6 deri me datën 10 të çdo muaji dhe kërkesën për përmirësimin e kushteve.
