Avokati, Visar Rrecaj, thotë se Lëvizja Vetëvendosje si parti fituese nuk ka vullnet për të dalë nga ngërçi politik në mënyrë që të bëhet konstituimi i Kuvendit të Kosovës.
Ai tha se problemi qëndron te propozimi i kandidates për kryetare të parlamentit.
“Problemi është se as partia fituese nuk po ka vullnet me dalë nga ngërçi politik dhe e kandidon 13 herë Albulena Haxhiun. Në qoftë se ka një zotim prej partive opozitare që ndrro kandidatin dhe ta votojmë, pse nuk po e bën hapin? Pse Albulena Haxhiu qëndron 13 herë e propozuar kur e dinë që s’i ka votat?”, tha avokati.
Ai thotë se LVV-ja nuk mund të veprojë si fituese absolute, përderisa nuk i ka votat.
“Ju takon për ta propozuar, por s’po i mbërrin. Në qoftë se partia fituese e zgjedhjeve kishte me i pasë numrat mjaftueshëm kish kaluar dhe do të ishte mbyllur kjo çështje. Mirëpo, nuk po i mbërrin numrat dhe kjo tregon që nuk e ke luksin si parti fituese që mos ta dëgjosh askënd dhe të sillesh si fitues absolut, sepse nuk je”, tha ai.
