Kapiteni i Kosovës, Amir Rrahmani e ka vlerësuar tejet të rëndësishme duelin me Rumaninë në kuadër të kualifikimeve për “Euro 2024”. Në fakt, Rrahmani ka thënë se kjo është ndeshja më e rëndësishme në këto kualifikime, pasi Kosova përballet me konkurrentin kryesor për vendin e dytë në grup. E sipas tij, duke pasur parasysh rëndësinë e këtij dueli, Kosova të premten mbrëma do të dalë në fushë për ta fituar ndeshjen. E për ti marrë pikët e plota, Rrahmani pret edhe përkrahjen e tifozëve nga tribunat.
“E kemi ndeshjen më të rëndësishme në këto kualifikime, pasi kemi përball konkurrentin kryesor për vendin e dytë. Rumania ka 6 pikë me plot meritë dhe shpresoj që ne të luajmë lojën tonë, të fitojmë dhe ti afrohemi me pikë Rumanisë. Është ndeshje që do ta vendos shumë fatin e këtij grupi dhe pres përkrahje nga tifozët për ta mposhtur Rumaninë, në mënyrë që të mbajmë gjallë shpresat për kualifikim. Synimi është ta fitojmë këtë ndeshje dhe do të japim gjithçka nga vetja për fitore”, ka thënë Rrahmani.
Rrahmani ka thënë se Kosova nuk i frikësohet aspak Rumanisë dhe është maksimalisht e motivuar për këtë ndeshje.
“Nuk i frikësohemi Rumanisë sepse kemi luajtur kundër lojtarëve më të fortë. Frika jonë e vetme është nëse jemi ekipi i duhur në momentin e duhu. Pra, duhet të jemi ata që jemi, si dhe të luajmë lojën tonë”, ka thënë Rrahmani, i cili ka thënë se Kosovës i mungoi fati në dy ndeshjet e para për ti marrë pikët e plota. “Prej dy ndeshjeve të para, e kemi parë që Kosova ka bërë disa gabime dhe për këtë lojtarët e kanë fajësuar veten. Besoj se kemi reflektuar dhe pres që mos ti përsëritim gabimet. Kemi mundur ti kemi gjashtë pikë, pasi ndaj Izraelit në fund kemi pasur mundësinë ta fitojmë ndeshjen. Ndërsa, edhe ndaj Andorrës kemi mundur ta fitojmë pasi kundërshtari pati vetëm një gjuajtje në portë. Arsyeja e këtyre barazimeve ishte se nuk i shfrytëzuam të gjitha rastet dhe është dashur të reagojmë më mirë”.
Rrahmani ka thënë se i njeh disa prej lojtarëve të Rumanisë, ndërsa ka pranuar se në rast të humbjes në këtë ndeshje, atëherë Kosova do të jetë 99 për qind jashtë Evropianit të vitit të ardhshëm.
“Kjo ndeshje vendos gjithçka dhe nëse humbin, atëherë do të jemi 99 për qind jashtë Evropianit”, tha ai.
