Skuadra e Napolit ka nisur vitin 2025 me fitore në Serie A, ndërsa Amir Rrahmani insiston se është herët të flitet për titullin e kampionit.
Napoli, vikendin e shkuar triumfoi 3:0 në udhëtim te Fiorentina, ndeshje në të cilën kapiteni i Kosovës ishte i pazëvendësueshëm tek ekipi i trajnerit Antonio Conte.
Me këtë fitore, Napoli ka rikthyer pozitën e parë në tabelë me 44 pikë, katër më shumë se Interi që renditet i treti dhe ka dy ndeshje më pak të luajtura.
Rrahmani ka thënë se është i kënaqur që vitin e ri e kanë nisur me fitore, ndërsa kur është pyetur për titullin e kampionit, mbrojtësi është treguar i matur.
“Është herët të flitet për Scudetto, pasi jemi vetëm në gjysmën e sezonit. Duhet të shikojmë për ndeshjen e radhës pasi na presin shumë duele të vështira deri në fund”, është shprehur Rrahmani.
30-vjeçari ka 19 ndeshje të luajtura deri më tani në Serie A, ndërsa ka shënuar 1 gol dhe ka bërë 2 asistime.
