Deputeti, Eman Rrahmani, prijës i listës së kandidatëve për deputetë nga koalicioni “Lista për Familjen” ka thënë se synimi i tyre është që të bëhen pjesë e Kuvendit pas zgjedhjeve të 9 shkurtit të vitit 2025.
Ai ka thënë se për këtë punojnë në baza ditore dhe se me mbështetjen që po e gjejnë në teren, sipas tij kjo është e mundur.
“Pritjet tona janë që të jemi pjesë e Kuvendit dhe për kët angazhohemi në baza ditore edhe besojmë që këtë me punë e angazhim do ta arrijmë. Fryma që po e gjejmë në teren është e përshtatshme, mbështetja popullore ekziston, sa arrijmë me kapitalizu është çështje organizative e këtij koalicioni”, ka thënë Rrahmani në emisionin “Këndi i Debatit”në Tëvë1.
Ai i pyetur për bashkëpunimin me ndonjë parti, tha se nuk kanë preferenca por as vija të kuqe për asnjë parti.
Rrahmani ka thënë se janë të gatshëm të bashkëpunojnë me gjitha partitë që pranojnë kauzën e tyre për familjen.
Megjithatë, Rrahmani ka thënë se më shumë preferojnë të qëndrojnë në opozitë se sa të jenë pjesë e ndonjë koalicioni të madh ku s’kanë ndikim.
Ai ka thënë se sektori i shëndetësisë është ndër prioritet kryesore, programin për të cilin tha se do ta prezantojnë javë e ardhshme.
