Kapitenit të Kombëtares së Kosovës, Amir Rrahmanit i kanë mjaftuar vetëm 13-të ndeshje në Serie A me Napolin për t’u konfirmuar si njëri prej lojtarëve më të rëndësishëm të trajnerit Antonio Conte.
Rrahmani po shkëlqen këtë sezon te Napoli dhe është shndërruar në lider të ekipit, falë aftësive që po i shfaq si në mbrojtje ashtu edhe në ndërtimin e aksioneve.
I quajtur nga trajneri Conte me nofkën “kompjuteri”, Rrahmani po kujdeset që edhe sulmet e Napolit nga mbrojtja të nisin prej tij dhe këtë më së miri e dëshmojnë statistikat në kampionat.
Rrahmani është lojtari që deri më tani ka më së shumti prekje të topit – 957, si dhe pasime të bërë dhe pasime të kompletuara.
Rrahmani ka regjistruar 832 pasime, prej të cilave 766 i ka të kompletuara, duke i renditur i katërti, përkatësisht i dyti në renditjen e përgjithshme të Serie A.
Vetëm në ndeshjen e fundit ndaj Romës, të cilën Napoli e fitoi 1:0, Rrahmani regjistroi numra impresiv, ku pati 123 prekje të topit dhe 110 pasime, ku 100 ishin të sakta.
Në 13 ndeshje të luajtura deri më tani në kampionat, Rrahmani ka kontribuar edhe me 2 asistime.
