Albion Rrahmani dhe Qëndrim Zyba kanë shprehur optimizmin e tyre para ndeshjes së Kosovës që e luan në udhëtim tek Andorra, të enjten mbrëma në kuadër të kualifikimeve për “Euro 2024”.
Dy futbollistët janë pjesë e grumbullimit të Kosovës, i cili nisi të hënën dhe të martën kanë stërvitur me pjesën tjetër të ekipit nën urdhrat e selektorit Primozh Gliha. Përderisa sulmuesi Rrahmani ka debutuar muajin e shkuar te Kosova, mesfushori Zyba është ftuar për herë të parë. Në fakt, Zyba është njëri prej tre futbollistëve të Superligës së Kosovës që kanë marrë ftesë nga Gliha.
Krahas tij, janë edhe Lumbardh Dellova, të cilin e ka bashkëlojtar te Ballkani dhe Ilir Krasniqi i Llapit. Rrahmani, i cili është pjesë e Rapidit të Bukureshtit, ka thënë se me padurim pret duelin ndaj Andorrës, në të cilin shpreson të shënoj gol dhe ta ndihmoj Koosvën të regjistrojë fitoren e parë në këtë cikël eliminator.
“Gjendja e ekipit është jashtëzakonisht e mirë. Shpresoj se të gjithë bashkëlojtarët të jenë në fizikun 100 përqind. Na pret një ndeshje e vështirë, por besoj që me kualitetin që kemi do të marrim rezultatin pozitiv dhe pse jo tre pikë. Është ndjenjë e veçantë ta kesh barrën kryesore te kombëtarja, të cilën e kam ëndrruar me vite që të jem pjesë e saj. Jam shumë krenar që tashmë do të kem hapësirë që ta ndihmojë kombëtaren. Besoj që në këtë ndeshje të shënoj dhe ta ndihmoj ekipin. Shpresoj që gjithçka të shkoj mirë. Unë do ta lë shpirtin në fushë për këtë fanellë, sepse është nder dhe krenari ta kesh në trup”, ka thënë Rrahmani, i cili pritet të jetë titullar për shkak se Vedat Muriqi është i suspenduar ndërsa Shkëlqim Vladi i lënduar. E hapësirë në ndeshjen me Andorrën, shpreson të ketë edhe Zyba.
“Më të vërtetë është një prej ëndrrave që kam pasur që nga fëmijëria dhe më është realizuar. Çdo moment që i duhemi shtetit tonë jemi në gjendje për të dhënë më të mirën tonë. Falë Zotit jam me një formë mjaft të mirë dhe shpresoj që atë që di të bëj më së miri ta ndihmoj ekipin nëse më jepet mundësia. Djemtë janë të shkëlqyeshëm. Ata na kanë pritur shumë mirë neve që jemi më të rinj dhe i falënderoj shumë sepse na kanë afruar shumë shpejt në grup. Andorra? Çdo kundërshtar është i vështirë, por ne do të japim maksimumin dhe do t’i bëjmë detyrat që na cakton trajneri. Patjetër duhet të shkojmë për fitore”, ka thënë Zyba.