Rreth orës 14:30, është pranuar një informacion për një incident të dhunshëm në rrugën “Shpëtim Robaj” në Komoran, ku është raportuar për një rrahje dhe të shtëna armësh. Sipas zëdhënëses së Policisë së Kosovës për Rajonin e Prishtinës, Flora Ahmeti, për Tëvë1 nuk ka persona të lënduar në këtë ngjarje.
Policia ka dalë menjëherë në vendin e ngjarjes dhe ka konstatuar se ka pasur të shtëna me armë, por vetëm dëmtim të pronës, më konkretisht dëmtim të një veture. Dëmtimi i pronës është raportuar si pasojë e të shtënave me armë, ndërsa nuk ka pasur viktima apo të lënduar në këtë incident.
Për shkak të përfshirjes në këtë ngjarje, policia ka shoqëruar dy persona në stacionin policor për intervistim. Hetimet janë duke vazhduar për zbardhjen e rrethanave dhe motiveve që kanë çuar në këtë incident.
Zëdhënësja e Policisë, Flora Ahmeti, ka theksuar se incidenti nuk ka lidhje me procesin e zgjedhjeve që po zhvillohen sot, duke shuar çdo dyshim se ngjarja mund të ketë pasur ndikim në procesin zgjedhor.
Policia e Kosovës është angazhuar për të siguruar rendin dhe sigurinë gjatë ditës së zgjedhjeve, si dhe po punon intensivisht për zbardhjen e këtij incidenti të dhunshëm.
