Për herë të fundit, Marko Roshiq u pa në publik më 21 qershor para gjyqit në fjalën e tij përfundimtare.
Por një javë pas, në momentin e shpalljes së aktvendimit, Roshiqi dhe tre të akuzuarit e tjerë për vrasjen e politikanit serb Oliver Ivanoviq, nuk ishin prezentë.
Në të njëjtën ditë, Policia e Kosovës nuk e gjeti as në shtëpi kur i shkoi për ta arrestuar.
Sipas zëvendës drejtorit të Policisë për rajonin e veriut Veton Elshani, ka gjasa që ai është arratisur në Serbi duke shfrytëzuar rrugët ilegale.
Detaje për rastin e Roshiqit kanë dhenë edhe nga Gjykata Themelore në Prishtinë.
Sipas tyre, me të pranuar informatën nga Policia se nuk kanë mundur të ekzekutojnë vendimin, kanë lëshuar urdhër arrest për të.
“Me aktgjykimin e shpallur, gjykata i ka caktuar të akuzuarit M.R edhe masën e paraburgimit, ku po me datë 28.06.2024, ka marrë aktvendim të posaçëm me të cilin të akuzuarit i është caktuar masa e paraburgimit. Aktvendimin për caktimin e masës së paraburgimit, gjykata përmes e-mail ia ka dorëzuar: Prokurorisë Speciale, Policisë së Kosovës, Avokatit Mahmut Halimi dhe të akuzuarit M.R (përmes postës). Të gjithë këta të apostrofuar kanë konfirmuar pranimin e vendimit, përpos për të akuzuarin M.R, nuk kemi ende konfirmim nga posta, nëse e ka pranuar vendimin apo jo. Gjykata pas informimit nga Policia Kosovës, se nuk kanë mundur ta ekzekutojnë vendimin e gjykatës, menjëherë ka lëshuar Urdhër-arrest, për sigurimin e prezencës së të akuzuarit dhe dërgimin e të njëjtit në paraburgim. Tani rasti është me Urdhër-arrest për arrestimin e këtij të akuzuari, e të cilin urdhër e ka në zbatim Stacioni Policor në Mitrovicë”, tha zëdhënësja e Gjykatës Themelore në Prishtinë, Mirlinda Gashi.
Sipas Valdet Hoxhës njëra nga arsyet që e mundëson ikjen e këtyre personave është edhe stërzgjatja e procesit gjyqësor.
Vendimi për Marko Roshiqin dhe tre të akuzuarit e tjerë u mor më 28 qershor të këtij viti.
Roshiqi dhe Nedelko Spasojeviqi, Dragisha Markoviqi dhe Zharko Jovanoviqi u dënuan për pjesëmarrje në grup të organizuar kriminal që organizoi vrasjen e Ivanoviqit dhe për keqpërdorim të detyrës zyrtare.
