Isco mbetet një emër interesant në merkato, me spanjollin i cili momentalisht është pa klub, pasi në janar ndërpreu kontratën me Sevilla.
30-vjeçari ishte shumë pranë zyrtarizimit në Bundesliga te skuadra e Union Berlin, me palët që ishin bërë gati të firmosnin, por në fund gjithçka dështoi, pasi ai nuk ra dakord për kushtet financiare dhe tani ishi i Real Madrid është në kërkim të një skuadre të re.
Së fundmi, mediet spanjolle kanë raportuar se Isco po kërkon me ngulm transferimin te Roma, pasi ai beson se mund të jetë pasuesi i Zaniolo-s, me këtë të fundit që është gjithashtu në një situatë të vështirë.
Karriera e Isco-s ka pësuar një rënie drastike, duke lënë pas ato nëntë sezonesh me madrilenët ku fitoi gjithçka dhe realizoi 51 gola në 351 ndeshje.
Sa i përket mundësisë së lëvizjes së tij drejtë Romës, spanjolli duhet të presë, pasi Zaniolo është në bisedime me Galatasaray, por këta të fundit ende nuk kanë bërë një lëvizje konkrete, ndërsa në Spanjë besojnë se nëse italiani largohet, Isco do t’i bashkohet Romës pasi edhe Mourinho ka dhënë dritën jeshile për këtë lëvizje.
Në fund, kontrata. Nëse Isco hodhi në erë marrëveshjen me gjermanët e Union Berlin, te Roma ai është i detyruar të pranojë çdo ofertë, pasi në këto kushte ai nuk është në pozicionin për të kërkuar maksimumin dhe për të, në apsektin profesional, Roma do të ishte “treni” i fundit në karrierë.
