Mbrojtësi i Gjilanit, Marko Roganoviq ka folur në prag të ndeshjes me Ferizajn, e cila hap xhiron e dhjetë të Superligës së Kosovës në futboll.
Roganoviq të enjten është paraqitur të enjten në konferencën për shtyp, ndërsa dueli Gjilani – Ferizaj, luhet të premten prej orës 13:00.
Roganoviq ka thënë se ekipi është përgatitur maksimalisht gjatë këtij pushimi dy javor, ndërsa ka vënë në pah rëndësinë e pikëve ndaj Ferizajt për vazhdimësinë e kampionatit.
Sipas tij, Gjilani synon fitoren në këtë përballje për të nisur ngritjen në renditjen tabelare.
“Natyrisht se jemi të përgatitur për këtë ndeshjen. Kemi pasur kohën e mjaftueshme për ta analizuar kundërshtarin dhe për t’u bërë gati. Jemi të gatshëm për ta bërë maksimumin dhe për t’i marrë pikët e plota. Çdo ndeshje është e rëndësishme, ashtu sikurse edhe ndeshja e nesërme. Ne synojmë të marrim maksimumin e pikëve dhe të ngrihemi në tabelë, pasi që ky është qëllimi ynë”, është shprehur Roganoviq.
Pas tetë ndeshjeve të luajtura deri më tani, Gjilani ka tubuar 9 pikë dhe është i shtati në tabelë, ndërsa Ferizaj renditet një pozitë më poshtë dhe ka 7 pikë të mbledhura.
