Ministrja e Ekonomisë Artane Rizvanolli, ka vizituar Ndërmarrjen “Ibër Lepenci”, me ç’rast është mirëpritur nga kryeshefi i kësaj ndërmarrjeje, Faruk Muja.
Përmes një postimi, Rizvanolli ka shkruar se gjatë vizitës, kanë takuar edhe patrullën e policisë tek diga e vogël kompensuese, të cilët sipas saj, me shumë përkushtim po punojnë për sigurinë e të gjithë qytetarëve.
“Nivelet e ujit në digën e liqenit të Ujmanit aktualisht janë ndër më të lartat me 303 milionë metra kub. Me sasinë e ujit 5 metra nën maksimum, ajo qëndron stabile e aty punojnë 21 punëtorë. Së bashku me Zëvendës Ministrat, Geotar Mjeku dhe Nenad Stanojević u mirëpritëm nga Kryeshefi Faruk Mujka, ku diskutuam mbi performancën e ndërmarrjes, sigurinë e digës dhe mundësitë për investime në hidrocentral dhe përgjatë kanalit. Përgjatë vizitës takuam edhe patrullën e policisë tek diga e vogël kompensuese, një patrullë profesionale e multi-etnike që me zell e përkushtim po punojnë për sigurinë e të gjithë qytetarëve”, ka shkruar Rizvanolli në Facebook.
Më tej, Rizvanolli ka shkruar se Ndërmarrja “Ibër Lepenci”, në vitin 2023 ka siguruar të hyra në vlerë prej 10 milionë euro.
“Ndërmarrja “Ibër Lepenci” e cila menaxhon këtë digë, në vitin 2023 ka siguruar të hyra në vlerë prej 10 milionë euro. Rritje të lartë ka pasur edhe prodhimi i energjisë elektrike nga Hidrocentrali që gjatë vitit 2023 ka shënuar rekord e janë prodhuar 146 mijë megavatëorë energji elektrike, që shënon rritje prej 95% prej vitit paraprak”, thuhet tutje në postimin e saj.
