Ministrja në detyrë e Ekonomisë, Artane Rizvanolli, ka reaguar ndaj informacionit që po qarkullon në media lidhur me importin e energjisë nga Serbia.
Rizvanolli tha se lajmi është dezinformim dhe formë “paditurie”.
Ajo në një postim në Facebook ka shkruar se pas pavarësisë energjetike të Kosovës në vitin 2020, Serbia ka bllokuar tregtimin e energjisë në linjat Kosovë-Serbi.
“Serbia ka bllokuar tregtimin në linjat Kosovë-Serbi që nga pavarësimi energjetik i Kosovës më 2020. Ky është edhe një prej faktorëve kyçë që shpesh çon në ngarkesë të tepërt (kongjestion) në linjat mes Malit të Zi e Kosovës dhe mes Maqedonisë së Veriut e Kosovës”, ka shkruar ajo.
Rizvanolli apeloi te ata që shpërndajnë informacion në lidhje me sektorin e energjisë që të jenë të saktë dhe të informohen në mënyrë të duhur.
“Lus të gjithë që deklarohen dhe publikojnë ‘informata’ e ‘lajme’ në lidhje me sektorin e energjisë që të informohen saktë paraprakisht!”, ka shkruar ajo./teve1.info/
