Punimet kanë përfunduar.
E përurimi i këtij rezervuari të ujit me kapacitet prej 30.000 metra kub u bë të mërkurën në fshatin Mihaliq të Vushtrrisë.
Shiritin e preu ministrja e Ekonomisë, Artane Rizvanolli, e cila tha se me këtë projekt mund të manovrohet me infrastrukturën kritike nëse është e nevojshme.
“Rezervuari që po e inaugurojmë sot ka një kapacitet prej 30.000 metra kub ujë dhe ofron rezerva për 24 orë për termocentralin e KEK-ut ose për furnizim me ujë për KRU Prishtinës, në rast të ndonjë aksidenti apo incidenti tjetër që shpresoj të mos e kemi kurrë. Sidoqoftë falë punës suaj ne mund të qëndrojmë më të qetë me këtë rezervuar të ri që e kemi dhe hapësirë që na epet për të manovruar me infrastrukturën kritike”, ka deklaruar ajo.
E kryesuesi i “Ibër Lepencit” Faruk Mujka, e cilësoi këtë projekt edhe si mundësi e rritjes ekonomike.
“Projekti që po e inaugurojmë sot rezervuari akumulues për rritjen e sigurisë dhe stabilitetit të furnizimit me ujë, nuk është thjeshtë një investim në infrastrukturë por një investim në sigurinë kombëtare, mirëqenien e qytetarëve tanë dhe ekonominë e vendit tonë”, ka deklaruar Mujku.
Mujka shtoi se ky rezervuar është i nevojshëm në rast se mund të ketë momente të vështira të furnizimit me ujë.
“Me këtë projekt, ne po garantojmë që qytetarët e Prishtinës dhe KEK-u do të kenë një furnizim të qëndrueshëm dhe të sigurt me ujë edhe në kohërat më të vështira”
Pas përfundimit të ceremonisë, ministrja Rizvanolli e drejtorë të kompanisë kontraktuese të punimeve, realizuan fotografi të përbashkët.
