Ministrja e Ekonomisë, Artane Rizvanolli ka thënë se është gënjeshtër se reduktimet me energji elektrike që kanë përfshirë disa pjesë të vendit kanë ardhur si pasojë e rritjes së konsumit të energjisë, pas subvencionimit të pajisjeve ngrohëse efiçiente.
Ajo ka thënë se kjo nuk ka bazë teorike, e as empirike.
“Po flitet e shkruhet kinse masat subvencionimit të pajisjeve ngrohëse efiçiente nga Ministria e Ekonomisë kanë ndikuar në – ose madje edhe e kanë shkaktuar – rritjen e konsumit e mbingarkesën në rrjet që ka shkaktuar probleme në furnizim gjatë ditëve të fundit në disa zona të Kosovës. Kjo është një gënjeshtër që nuk ka bazë teorike, as empirike”, ka shkruar Rizavnolli.
Rizvanolli ka paraqitur edhe fakte që sipas saj që përfituesit e këtyre subvencionimeve kanë ulur konsumimin e energjisë elektrike.
“Në bazë të të dhënave empirike:përfituesit kanë ulur konsumimin e energjisë elektrike per mesatarisht 19% në dimirin, pra pasi i kanë instaluar pajisjet efiçiente. Përfituesit kanë kursyer 27 milionë kilovatorë (kWh) deri tani, ose 5 milionë euro me një çmim mesatar importi”, ka shkruar ajo duke thënë se pa subvencionim, situata do të ishte shumë më keq.
“Është e frikshme se si një dezinformatë që u nis si propagandë e dobët nga disa deputetë para disa muajsh, u reciklua nëpër studio televizive e në shtyp, me sa duket pa marrë mundin askush që së paku të analizojë kriteret e thirrjes apo të konsultojnë ndonjë ekspert të fushës”, ka thënë ajo ndër të tjera.
Ndryshe deputeti i PDK-së, Mergim Lushtaku ka thënë se mbingarkesa në rrjetin elektrik është shkaktuar pasi qeveria ka subvencionuar mijëra familje për ngrohje me energji elektrike.
“Kjo qeveri ka subvencionuar mbi 15 mijë familje për të kaluar në ngrohje me energji elektrike përmes pompave termike, kondicionerëve dhe pajisjeve të tjera, duke zëvendësuar ngrohjen tradicionale me dru, pelet, briket dhe thëngjill. Kjo është bërë pa investuar asnjë burim të ri energjetik! Asnjë përmirësim në kapacitetet e KEK-ut të vjetër dhe as ndonjë investim në centrale të reja, si p.sh., mundësia për centralet me gaz amerikan”, ka shkruar ai ndër të tjera.
