Të premten (më 25 prill) në orën 14:00, në varrezat e martirëve në Rahovec, do të bëhet rivarrimi i eshtrave të Elhami Tahiragës, i vrarë në sulmin serb në Rahovec në korrik të vitit 1998.
Kështu është bërë e ditur nga Komuna e Rahovecit përmes një njoftimi në Facebook.
“Njoftojmë opinionin se, më 25 prill 2025, në orën 14:00, në varrezat e martirëve në Rahovec, do të bëhet rivarrimi i eshtrave të Elhami Tahiragës, i vrarë në sulmin serb në Rahovec në korrik 1998. Identifikimi i eshtrave të të njderit është bërë përmes analizave të ADN-së nga instituti përkatës. Ceremoninë e rivarrimit e organizon Komuna e Rahovecit dhe Komisioni Qeveritar për Persona të Zhdukur”, thuhet në njoftim.
Komisioni Qeveritar për Persona të Zhdukur ka njoftuar se identifikimi i eshtrave të të ndjerit është bërë në muajin mars përmes analizave të ADN-së nga Instituti i Mjekësisë Ligjore.
“Pas 26 vitesh, falë identifikimit të kryer me metodën shkencore të ADN-së, është bërë e mundur identifikimi i mbetjeve mortore (eshtrave) të Elhami (Qamil) Tahiraga nga Rahoveci, i cili figuronte në Listën e Personave të Zhdukur që nga periudha e luftës në Kosovë. Komisioni Qeveritar për Persona të Zhdukur, së bashku me Institutin e Mjekësisë Ligjore, ka informuar zyrtarisht familjen Tahiraga mbi rezultatet e procesit të identifikimit. Me këtë rast, Komisioni Qeveritar për Persona të Zhdukur shpreh solidaritet dhe mbështetje të sinqertë familjes Tahiraga, duke shpresuar që ky identifikim t’u sjellë sadopak lehtësim pas një pritjeje të gjatë e të dhimbshme”, bëhet e ditur në njoftim
