Në Kompleksin Memorial të Varrezave të Dëshmorëve dhe Martirëve në Lybeniq të Pejës, me nderime ushtarake u rivarrosën Muharrem Bobi e Jashar Hamzaj, të vrarë nga forcat serbe në masakrën e Lybeniqit.
Kështu ka bërë të ditur Komisioni Qeveritar për Persona të Zhdukur.
Për 23 vite me radhë këto eshtra ishte menduar që i takonin Bajram Alimehajt dhe Selim Aliçkajt, mirëpo analizat e ADN-së e treguan të kundërtën.
“Familjet e viktimave të luftës Bajram Alimehaj dhe Selim Aliçkaj, ashtu si të gjitha familjet e personave të zhdukur dhe viktimave të masakrave të Lybeniqit kishin ofruar gjithë përkrahjen e nevojshme, duke përfshirë edhe mbështetjen në një proces të ri-zhvarrimit në Shtator të vitit 2022 të mbetjeve mortore që deri në atë kohë mendohej që i përkisnin viktimave Bajram Alimehaj dhe Selim Aliçkaj, mirëpo që pas procedimit me qëllim të identifikimit përmes analizës së ADN-së ka rezultuar me identifikimin e Jashar Hamzaj dhe Muharrem Bobi që për këto 24 vite vazhdonin të ishin në Listën e Personave të Zhdukur”.
“Gjatë ceremonisë së rivarrimit, përfaqësuesit e Komisionit Qeveritar për Persona të Zhdukur, krahas ngushëllimit për familjet Hamzaj dhe Bobi , shprehën edhe gjithë mirënjohjen dhe falënderimin për të gjitha familjet që përkundër dhimbjes e ankthit të pritjes në vazhdimësi janë duke mbështetur punën e institucioneve në përpjekjen e përbashkët për ndriçimin e fatit dhe vendndodhjes së gjithë personave të zhdukur me force”, thuhet në njoftimin e Komisionit Qeveritar për Persona të Zhdukur.
