Para 6 tetorit ishin rivalë.
Por, shkuarja në balotazh ka bërë që shumë kandidat për kryetar të komunave që ishin në garë me njëri-tjetrin të kenë marrëveshje politike.
Bekë Berisha i Aleancës për Ardhmërinë e Kosovës gjatë fushatës zgjedhore kishte kritikuar ashpër Përparim Ramën.
Por ai ka zyrtarizuar koalicionin me Lidhjen Demokratike kundër Hajrullah Çekut të Lëvizjes Vetëvendosjes.
E në kryeqytetet marrëveshje Vetëvendosje ka bërë me lëvizjen qytetare “Prishtina në dorën tënde”.
Partia Demokratike e Kosovës zyrtarisht nuk ka bërë të ditur se me cilën parti do të bëjnë marrëveshje, por deputeti i PDK-së, Enver Hoxhaj ditë me parë publikisht kishte deklaruar se vota e tij do të shkojë për Ramën e LDK-së.
Nga PDK nuk i kanë kthyer përgjigje televizionit se cilën parti do të përkrahë në kryeqytet.
Tëvë 1, ka pyetur edhe Endrit Zabërgjen e NISMA-së për rreshtimin e tij politik në kryeqytet por i njëjti nuk ka kthyer përgjigje.
E PDK dhe LDK janë bërë bashkë në Prizren, ku atje në balotazh janë Shaqir Totaj i PDK-së e Artan Abrashi i Vetëvendosjes.
Ndërsa Vetëvendosje ka nënshkruar koalicion me Bashkimin Demokratike të Zafir Berishës , AAK-në dhe me parti të komuniteteve të udhëhequr nga Emilja Rexhepi, Albert Kinolli dhe Erxhan Galushi.
Madje Berisha në një përgjigje me shkrim për tëvë 1, ka treguar arsyet e bashkëpunimit me Vetëvendosjen
“Koalicioni ynë për mbështetje të Artanit në balotazh është një përpjekje parimore e BD-së dhe e imja për të penguar që Prizreni të bjerë në duart e hajdutëve të rinj e të vjetër të PDK-së dhe LDK-së, të cilët kanë bërë një koalicion biznesor, e jo politik apo partiak, për interesat e tyre në Prizren. I njoh mirë të dy “shkollat” politike, të cilat në mënyrë të fshehtë bashkëpunojnë që nga viti 2009 për interesa të njësive parapolitike të këtyre dy partive. Marrëveshja legale më në fund pas 15 vitesh bashkëpunim nën tavolinë, duhet të ndalet më 9 nëntor”, ka thënë Berisha .
Garë e fortë është edhe në Mitrovicë, ku Faton Peci i cili garon në Listën e Vetëvendosjes e Arian Tahiri i PDK-së kanë vetëm 122 vota diferencë.
Këtu PDK ka arritur marrëveshje bashkëpunimi me LDK, AAK, AKR dhe Partinë Demokratike Turke të Kosovës për ta mundur Pecin.
Kurse në Vushtrri, LDK i ka dalë në mbështetje LVV-së, edhe pse ky koalicion nuk e kishte pajtimin e kryesisë së LDK-së.
E LDK ka bërë koalicion me PDK-Në, Nismën dhe PLE-në për të fituar Fushë Kosovës, kurse Lëvizja Vetëvendosje në këtë komunë është bashkuar me AAK-në.
AAK-së ftesë për bashkëpunim i ka dërguar Vetëvendosja edhe në Pejë. Por kjo ftesë nuk është pranuar ende zyrtarisht.
“Nuk kemi pranuar ndonjë përgjigje zyrtare, kështu me disa prej strukturave të tyre jemi në kontakt dhe kanë shprehur gatishmëri me u rreshtu për ndryshimin e qeverisjes që është tash e 12 vite”, ka thënë Kelmendi.
Por ndonëse në Pejë nuk ka zyrtarisht marrëveshje, një e tillë me Vetëvendosje është arritur në Junik ndërmjet AAK dhe LVV-së.
Ndërsa Lidhja Demokratike në Junik ka pasur koalicion me PDK-në që nga raundi i parë.
PDK ka koalicion me Lëvizjen Vetëvendosje në qytetin e Dragashit, poashtu edhe me VAKAT-in dhe kandidatin e pavarur Nexhemedin Sejdilar. Kurse LDK është në koalicion që nga raundi i parë me SDU-në e Duda Baljes.
Përveç në Pejë, koalicionet nuk janë zyrtarizuar as në Gjakovë, Klinë, Suharekë, Rahovec, Viti, e Kaçanik.
