Komisioni Qendror i Zgjedhjeve (KQZ) ka vendosur të realizojë rinumërim të plotë të votave në vendvotimet e rregullta, pas mospërputhjeve të evidentuara mes votave të kandidatëve dhe numrit të përgjithshëm të votave të regjistruara.
Sipas KQZ-së, mospërputhjet më të konsiderueshme nuk prekin kandidatët më të votuar të secilës parti.
Deri më tani, janë rinumëruar mbi 700 vendvotime, nga gjithsej 2,557 që do të verifikohen 100% gjatë procesit të rinumërimit.
Ndryshime të dukshme ka te Vetëvendosja.
Liderit Albin Kurti i janë hequr 176 vota, ndërsa disa kandidatëve të tjerë të partisë, përfshirë Glauk Konjufcën, Hekuran Muratin, Albulena Haxhiun dhe Donika Gërvallën, iu janë shtuar nga 22 deri në 130 vota.
Te Partia Demokratike e Kosovës (PDK), kandidati më i votuar, Bedri Hamza, ka fituar deri më tani 51 vota shtesë, ndërsa Arian Tahiri, Përparim Gruda, Uran Ismaili dhe Sala Jashari kanë regjistruar qindra vota të reja.
Lëvizje ka edhe te Lidhja Demokratike e Kosovës (LDK), ku kryetari Lumir Abdixhiku ka humbur 14 vota, ndërsa Avdullah Hoti ka pak më pak. Kandidatët Hykmete Bajrami, Ukë Rugova dhe Doarsa Kica – Xhelili kanë fituar më shumë vota pas rinumërimit.
Edhe në Aleancën për Ardhmërinë e Kosovës (AAK) ka ndryshime të vogla. Ramush Haradinaj ka fituar një votë shtesë, ndërsa Daut Haradinaj, Besnik Tahiri dhe Time Kadrijaj kanë dhjetëra vota më shumë. Vetëm Bekë Berisha ka dy vota më pak pas rinumërimit.
KQZ ka bërë të ditur se procesi i rinumërimit do të vazhdojë deri në përfundimin e të gjitha vendvotimeve dhe rezultatet përfundimtare do të publikohen pas verifikimit të plotë. /teve1.info/
