Ata që për çfarëdo arsye kanë hequr dorë nga shtetësia kosovare, rikthimin e saj mund ta bëjnë me zero cent.
Përmes një vendimi të Qeverisë, janë larguar tarifat që varionin nga 200, 250 dhe 370 euro, në varësi të shtetit nga bëhej aplikimi.
Ani pse këto shuma nuk janë aq të larta për mërgimtarët, ata e mirëpresin këtë vendim.
“Këto lehtësira që i ofron Qeveria e Kosovës, nuk është një shumë kumedit sa. Mirëpo, është një simbol dhe një sinjal që Qeveria e Kosovës, kujdeset dhe mendon për mërgatën tone”, tha mërgimtari Ramiz Arifi.
“Dy vajzat shembull që janë në procedurë e sipër për më marrë nënshtetësinë e Kosovës. Na e kanë mundësu një lehtësim hala më tepër dhe gjithsesi që posa të kthehen ato do t’i kryjmë këto procedura”, tha Xhabir Vladi – mërgimtar.
Sipas tyre, me largimin e regjimit të vizave, veçse i është shtuar vlera pasaportës kosovare.
“Pasaportën e Kosovës gati të gjitha shtetet janë duke e njohur, kështu që po mundesh me shku pa viza, pa kurgjo nëpër Evropë. Edhe unë kisha thanë që nuk ka asgjë të keqe, nuk bën me refuzu nënshtetësinë e ktuhit, me nënshtetësinë e ndonjë vendi perëndimor”, tha një tjetër mërgimtar.
Mirëpo, bashkëatdhetarët kërkojnë që vëmendje t’i kushtohet edhe lëvizjes së lirë nëpër Serbi, sidomos gjatë qarkullimit në sezonet kur vijnë në Kosovë.
“Lëvizje e lirë do duhej të ishte që mërgata jonë të mos maltretohet, a hynë nga Maqedonia, a hynë nga Mali i Zi, apo nga Shqipëria, të kenë të drejtë të kthehen në vendet e punës, ku jeton dhe vepron, përmes Serbisë apo atyre shteteve kah don ajo. Ajo do të ishte lëvizje e lire”, tha Ramiz Arifi – mërgimtar.
E kjo nuk është kërkesa e vetme.
Për të pasur adresim të halleve të tyre, mërgimtarët kërkojnë të kenë një përfaqësues në Kuvend.
“Së paku të na mundëson një deputet prej vendeve evropiane, që të jetë në Kuvendin e Republikës së Kosovës. E pastaj ai të merret me të drejtat tona, se mërgimtarët janë shumë të përkushtuar për këtë vend”, tha Vladi.
Nga Ministria e Punëve të Jashtme dhe Diasporës, nuk kanë treguar për arsyen e marrjes së një vendimi të tillë dhe efektin potencial që mund ta ketë.
