Njohësi i çështjeve të sigurisë dhe drejtori i Institutit Octopus, Agim Musliu, ka reaguar pas lajmeve për rikthimin e Listës Serbe në zgjedhjet lokale të Kosovës që do të mbahen më 12 tetor.
Ai tha se ky veprim është shembulli më i qartë i lojës politike të presidentit të Serbisë, Aleksandar Vuçiq, i cili prej dy vitesh ka manipuluar me bojkotin e institucioneve në veri.
“Dy vitet e fundit, Aleksandar Vuçiq dhe Lista Serbe shpenzuan mund e energji duke i bllokuar institucionet në veri të Kosovës, vazhdimisht duke iu anku dhe duke ushtruar presion ndaj vendeve te QUINT-it me narrativen se Kosova duhet të lëshoj pe. Rezultati? Vetëm humbje kohe për partnerët tanë ndërkombëtarë dhe vetëm një përpjekje e dështuar për ta paraqitur veten si “mbrojtës” të serbëve te Kosovës”, ka shkruar Musliu në një postim në Facebok.
Ai shtoi se rikthimi i Listës Serbe nuk është reflektim i interesit të komunitetit serb në Kosovë, por një kartë negociuese e Vuçiqit me ShBA-në dhe BE-në.
“Sot, i njëjti Vuçiq e kthen Listën Serbe në garën zgjedhore të 12 tetorit, duke e “legalizuar” gjendjen që vetë e krijoi me bojkot. Ky është Vucici: fillimisht I nxjerr serbët nga institucionet, më pas i kthen aty, duke përdorur këtë lëvizje si kartë negociuese me SHBA dhe BE”, ka shkruar tutje Musliu.
Sipas tij, qëndrimi i institucioneve të Kosovës për të mos rënë pre e këtij presioni ka qenë vendimtar për ruajtjen e integritetit institucional.
“Duhet të pranojmë qe qeveria e RKS me institucionet e sigurisë vepruan drejt që nuk ranë pre e këtij presioni politik e diplomatik. Rezistuan ndaj lojës së Vuçiqit, duke ruajtur integritetin institucional dhe duke mos lejuar që veriu të përdorej si mjet pazari politik. Ky qëndrim i vendosur ka qenë vendimtar për të mos i dhënë Beogradit avantazhin që e kërkoi”.
