Pas një ndaljeje të përkohshme për shkak të rrjedhjeve të evidentuara në kaldajë, njësia B2 e Termocentralit “Kosova B” është rikthyer sërish në operim normal.
Korporata Energjetike e Kosovës ka njoftuar se ndërhyrjet teknike u realizuan me sukses nga ekipet e mirëmbajtjes dhe operimit, të cilat u mobilizuan menjëherë pas krijimit të kushteve të nevojshme për sanim.
Sipas KEK-ut, njësia B2 është rikthyer në funksion dje, rreth orës 12:00, dhe aktualisht po operon me një kapacitet prodhues prej rreth 290 MWh.
Në njoftimin për media, KEK ka theksuar se ndaljet e tilla teknike janë procese të zakonshme për termocentralet e këtij tipi, si pasojë e rrjedhjeve që mund të ndodhin në kaldaja ku janë të vendosura mbi 500 kilometra gypa.
“Duke marrë parasysh kohën e gjatë të shfrytëzimit të këtyre pajisjeve, rrjedhjet e tilla janë të pashmangshme dhe adresohen rregullisht nga ekipet tona profesionale”, thuhet në njoftim.
KEK ka shtuar se defekte të natyrave të ndryshme ndodhin edhe në termocentralet e tjera, si pjesë e proceseve të zakonshme operative, dhe se keqinterpretimet për ndaljen e përkohshme të njësive janë të pabazuara dhe të dëmshme për sistemin energjetik të vendit.
Korporata ka theksuar gjithashtu se këto ndalje teknike nuk kanë asnjë lidhje me projektin e modernizimit të turbinave në Termocentralin “Kosova B”, të cilin e konsideron një nga investimet më të mëdha dhe më të suksesshme të dekadave të fundit.
Në fund, KEK siguroi opinionin publik se po ndërmerren të gjitha masat e nevojshme për të garantuar stabilitetin e prodhimit të energjisë elektrike dhe furnizimin e qëndrueshëm për konsumatorët./teve1.info/
