Këtë të martë rikthehet Liga e Kampioneve, me nëntë ndeshje interesante.
Padyshim vëmendja më e madhe do të jetë te supersfida mes Bayern Munich dhe PSG-së, dy skuadra pretendente për trofeun, që do të përballen mes vete.
Si gjermanët, ashtu edhe francezët, nuk vijnë në këtë takim me ecuri të mirë në Champions dhe për këtë arsye e kanë detyrim fitoren.
Në katër ndeshjet e para, Bayern-i ka marrë dy fitore dhe dy humbje, ndërsa renditet në mesin e tabelës.
Më keq është situata te parisienët, që kanë marrë vetëm një fitore, dy humbje dhe një barazim, duke u pozicionuar në vendin e 25-të.
Në “Allianz Arena”, pritet një përballje shumë e luftuar dhe emocionuese, ashtu siç kanë qenë edhe në të kaluarën ndeshjet mes këtyre ekipeve.
Sfidë spektakolare pritet të jetë edhe ajo mes Inter-it dhe Leipzig-ut, dy ekipe që gjithashtu luajnë vetëm për të marrë 3 pikët.
Gjermanët po kalojnë një moment të errët, me katër humbje radhazi në Champions, por shpresojnë që ndaj Inter-it të jetë pika e kthesës.
Në krahun tjetër, krejt ndryshe është situata te kampionët e Italisë, që kanë marrë tri fitore dhe një barazim në katër ndeshjet e para dhe në këtë takim vijnë si favoritë.
Përballje e lehtë në letër për Manchester City-n, që pret në shtëpi holandezët e Feyenoord.
Arsenali ka një udhëtim të vështirë , ku përballet ndaj portugezëve të Sporting-ut, të cilët janë një nga surprizat e mëdha të këtij sezoni.
Barcelona pret në shtëpi Brestin, ndërsa Atalanta luan në transfertë ndaj Young Boys.
Këto sfida do të luhen në orën 21:00, ndërsa më herët, nga ra 18:45 Milani përballet me Slovan Bratislava, ndërsa ndeshja tjetër është Sparta Pragë-Atletico Madrid.
