Komisioni Qendror i Zgjedhjeve sot ka shpallur rezultatet përfundimtare të zgjedhjeve që janë mbajtur më 9 shkurt 2025, pasi kanë marrë dritën e gjelbër nga PZAP dhe Gjykata Supreme.
Vetë kryetari i KQZ-së, Kreshnik Radoniqi, ka pranuar problemet që kanë ndodhur gjatë procesit, megjithatë ka thënë se s’është cenuar integriteti i zgjedhjeve.
Radoniqi po ashtu ka bërë të ditur se me Ligjin e ri për Zgjedhjet, subjektet politike mund të ankohen në Panelin Zgjedhor për Ankesa dhe Parashtresa (PZAP) lidhur me këtë rezultat përfundimtar deri në 48 orë nga shpallja e tij.
“Afati 48 orësh fillon nga ora 17:00 e ditës së sotme”, ka sqaruar Radoniqi.
Mes tjerash, kreu i KQZ-së në mbledhjen e mbajtur sot ka treguar se më 9 shkurt kanë votuar në total 966 mijë e 283 apo 46, 54%.
Nga këto vota, LVV me Albin Kurtin ka marrë 396 mijë e 387 vota apo 42.30 %.
PDK me kandidat për kryeministër Bedri Hamzën ka marrë 196 mijë e 474 vota apo 20.95 %.
LDK me Lumir Abdixhikun ka marrë gjithsejtë 171 mijë e 357 vota apo 18.27 %.
AAK-NISMA ka marrë 66 mijë e 256 vota apo 7.06 % dhe Lista Serbe ka marrë 39 mijë e 915 vota apo 4.26 %.
