Disa muaj më parë i ishte bastisur banesa.
E të mërkurën në mëngjes, nipi i dëshmorëve, Fahri e Bahri Fazliut, u ndalua nga zyrtarë të Zyrës së Prokurorit të Specializuar.
“Pasi lashë djalin në çerdhe, duke hipur në veturë, më erdhën tre burra dhe dy gra, duke më thënë se jemi nga Prokuroria Speciale, se kanë një urdhër për bastisje, dhe për të ma marrë telefonin. Unë nuk ia dhashë telefonin pa ardhur avokati Çerkini. Desha ta thërrasë vet avokatin, por nuk më lanë dhe e njoftuan ata. Pasi erdhi avokati, nuk pranova sërish t’ua jap telefonin, dhe kështu shkuam në Fushë Kosovë në zyrat e tyre“, tha Fazliu.
Avokati i Fazliut, Artan Çerkini, thotë se nuk janë informuar për arsyet e këtij konfiskimi të telefonit, gjë e cila sipas tij është e kundërligjshme.
“Po cenohen dy të mira juridike, privatësia dhe pronësia. Në të tilla raste vazhdimisht kemi thënë se vendimi i Gjykatës duhet të jetë i arsyetuar se përse Gjykata po dyshon që Fazliu paska kryer ndonjë vepër nga juridiksioni i Gjykatës. Ndërsa ne në asnjë rast nuk po shohim këtë arsyetim të Gjykatës, dhe Gjykata vetëm po konstaton, e konstatimi është arbitar ngase nuk mbështetet në fakte“, tha Çerkini.
Të shqetësuar me këto veprime të prokurorisë shprehen familja Fazliu.
“Nuk pe dijmë çka po dojnë prej neve. Nuk jetohet kështu gjithmonë t’u tut kur po vijnë Policia e EULEX-i. Para shtatë-ve vijnë, fëmija flejt. Veç sa nuk e kanë thy derën para shtatë muajve”, tha nëna e Fahriut, Bahrie Fazliu.
Për këtë konfiskim të telefonit, ZPS-ja, është shprehur se nuk komenton veprimet e saj.
