Profesori i elektroenergjetikës, Vezir Rexhepi ka thënë se në vendimin e ZRrE-së për mospërfshirje të katër komunave veriore në tarifat e reja të energjisë elektrike ka diçka të paqartë dhe jotransparente.
Rexhepi në emisionin “Ditari” në Tëvë1 ka shtuar se një diferencë e tillë është e lartë dhe e pajustifikueshme.
“Thënë të drejtën për një territor siç është Kosova pra të ketë një ndryshim të madh diku te 16% dhe atje të ketë një moslëvizje të tarifave të energjisë elektrike jep të kuptohet që diçka pra nuk janë të qarta gjërat dhe faktikisht ndoshta edhe nuk janë transparente. Kjo është njëjtë sikur ta marrim për shembull të ketë ndryshime në një treg diku pune ose shërbimesh në Prishtinë me Zubin Potok ose Leposaviq, pra të ketë një rritje prej 16% është vërtetë shumë e lartë. Të ketë një diferencë kaq të madhe të energjisë elektrike ose të tarifave për konsumator mua më duket shumë e lartë dhe e pajustifikueshme”, është shprehur ai.
Zyra e Rregullatorit për Energji (ZRRE) ka thënë se vendimi për rritjen e tarifave të energjisë elektrike 16.1 për qind nuk do të përfshijë katër komunat veriore të vendit.
Sipas ZRRE-së komunat veriore – të cilat aktualisht furnizohen nga kompania Elektrosever – nuk përfshihen në këtë vendim, pasi siç thuhet nga ZRRE-ja, Elektrosever operon jashtë sistemit të Furnizuesit me Shërbim Universal dhe marrëdhëniet tarifore atje janë të ndryshme.
“Tarifat e miratuara nga Bordi i Zyrës së Rregullatorit për Energji (ZRRE) zbatohen nga Furnizuesi me Shërbim Universal duke filluar nga data 01 qershor 2025 në gjithë territorin ku ai operon. Nëse pyetja ka të bëjë me katër komunat veriore të vendit të cilat aktualisht furnizohen nga Elektrosever, atëherë këto tarifa nuk zbatohen në atë pjesë të territorit, për shkak se Elektrosever operon jashtë sistemit të Furnizuesit me Shërbim Universal dhe marrëdhëniet tarifore janë të ndryshme”, ka thënë ZRrE-ja.
