Kryetari i Shoqatës “Miqtë e Amerikës” Agim Rexhepi, tregoi disa nga aktivitetet e ditës së sotme për nder 4 korrikut, pavarësisë së Shteteve të Bashkuara të Amerikës.
Njëherit, Rexhepi tregoi se vetëm sot ka pranuar rreth 50 letra me urime nga senatorët e kongresistët amerikanë.
“Deri tash i kam marrë mbi 50 letra nga senatorët e kongresistët amerikanë që më kanë uruar 4 korrikun. Për dallim me vitet e kaluara këtë vit kemi pasur aktivitete më pak, për shkak se kemi dashur tu japim hapësirë institucioneve, shoqërisë civile, jo vetëm në Prishtinë, por në nivel Kosove që ta dëshmojnë veten. Aktivitetet tona kanë qenë shumë të fuqishme. Që në mëngjes është ndërruar flamuri amerikan tek shtatorja e Bill Clinton, është vendosur një flamur i ri, i kemi dhuruar disa shenja për sako që janë me flamur të ShBA-ve dhe atë të Kosovës dhe i kemi dhuruar disa postera”, tregoi Rexhepi në emisionin “Info Nata” në Tëvë1.
Kujtojmë që Shtetet e Bashkuara të Amerikës festojnë sot Ditën e Pavarësisë. 4 Korriku shënon 247-vjetorin e shpalljes së pavarësisë së Shteteve të Bashkuara të Amerikës. Deklarata e Pavarësisë është një dokument ku 13 kolonitë e Mbretërisë së Bashkuar nga Amerika e Veriut shpallën pavarësinë.