Shtetet e Bashkuara, përkujtojnë sot 22 vjetorin e sulmeve të përgjakshme të 11 shtatorit 2001, ku si pasojë mbetën të vdekur rreth 3.000 njerëz.
Kryetari i Shoqatës, “Miqtë e Amerikës”, Agim Rexhepi, tregoi që sot në nder të viktimave, kanë ndezur qirinj para Qeverisë së Kosovës, e që sipas tij, më e veçanta e aktivitetit të sotëm, ishte prezenca e njësive elite policore, shkruan teve1.info.
“Kemi bërë një lloj respekti ndaj atyre viktimave, aktivitetet tona kanë filluar në mëngjes para Qeverisë së Kosovës, kemi ndezur qirinjtë. Çka është e veçantë e këtij aktiviteti, në krahasim me vitet tjera, që me prezencën e tyre na kanë nderuar ne, shtetin e Kosovës, institucionet amerikane, ka qenë pjesëmarrja e njësive elite policore, e që është hera e parë që marrin pjesë në aktivitetet e Kosovës”, deklaroi Rexhepi në emisionin “Ditari”.
I pyetur cilat janë aktualisht marrëdhëniet e Kosovës me Shtetet e Bashkuara të Amerikës, Rexhepi vlerësoi që marrëdhëniet mes tyre nuk do humbasin kurrë.
“Ne si shoqatë, nuk kemi qenë asnjëherë të kyçur në vijën politike, që nga paslufta e tutje, jemi munduar të dërgojmë mesazhe nga këndi civil. Mirëpo, ato marrëdhënie nuk zbehen, nuk do të humbin, sepse populli shqiptar është falënderues dhe i vetëdijshëm që Shtetet e Bashkuara të Amerikës kanë bërë për Kosovën. Ndoshta, për momentin ka zbehje të raporteve ndërmjet përfaqësuesve të partive politike, mirëpo raportet shtetërore nuk mund të lëvizin. Unë kërkoj më shumë nga politika e jashtme, apo në këtë rast nga kryeministri, Albin Kurti”, shtoi tutje Rexhepi në Tëvë1.
Edhe këtë përvjetor, krerët shtetërorë të Kosovës kanë kryer homazhe te pllaka përkujtimore “Kosova kujton” në Prishtinë, e cila nderon viktimat e këtij sulmi./teve1.info/.
