Zëvendëskryeministrja në detyrë, Emilia Rexhepi, e ka quajtur të “turpshme,të papranueshme dhe jashtëzakonisht e rrezikshme”, deklaratën e kryetarit të të LDK-së, Lumir Abdixhiku, lidhur me propozimin e tij për një qeveri të tranzicionit, pas refuzimit që i bëri Kurtit për bashkëqeverisje.
Ajo ka thënë se në këtë propozim komunitetet jo-shumicë në Kosovë injorohen dhe eliminohen hapur nga dialogu politik
“E turpshme, e papranueshme dhe jashtëzakonisht e rrezikshme!Me këto fjalë mund ta përshkruaj deklaratën e liderit të LDK-së, Lumir Abdixhiku, me të cilën komunitetet jo-shumicë në Kosovë injorohen dhe eliminohen hapur nga dialogu politik. Një qasje e tillë është shoviniste, politikisht regresive dhe thellësisht e dëmshme për vizionin e një Kosove moderne dhe multietnike. Si zëvendëskryeministre e Qeverisë së Republikës së Kosovës për të drejtat e njeriut dhe për çështjet e komuniteteve jo-shumicë, por para së gjithash si boshnjakja më e votuar në zgjedhjet e fundit, duhet ta them qartë dhe me zë të lartë: Kosova nuk është dhe kurrë nuk do të jetë shtet i rezervuar vetëm për një grup etnik. Ajo i përket çdo qytetari të saj – qoftë ai shqiptar, boshnjak, turk, rom, serb, ashkali, egjiptian, goran apo kushdo tjetër që jeton dhe ndërton këtë vend”, ka shkruar ajo ndër të tjera.
Sipas saj, përjashtimi i komuniteteve tjera është një mesazh urretje.
“Retorika që bën thirrje për formimin e qeverisë vetëm përmes partive shqiptare, duke përjashtuar përfaqësuesit e komuniteteve të tjera, nuk është asgjë tjetër veçse një mesazh urrejtjeje dhe mohimi i të drejtave themelore të njeriut, si dhe një shkelje e Kushtetutës së Republikës së Kosovës. Kjo nuk është vetëm një gabim politik – kjo është një rënie morale”, ka shkruar ajo në Facebook.
