Deputeti i Lëvizjes Vetëvendosje, Arbër Rexhaj, thotë se nuk është për t’u habitur që kryetari i Pejës, Gazmend Muhaxheri, provon të hedh hije dyshimi mbi sulmin e Banjskës, me pretendimin që ishte inskenim i qeverisë.
Rexhaj thotë se ngjashëm me çështjen e dy të dyshuarve për spiunim, organet e rendit duhet të merren edhe me Muhaxherin.
“Ditëve të fundit pamë edhe arrestimin e dy të dyshuarve për spiunim, të cilët me direktiva të BIA-s kishin për qëllim hedhjen e dyshimeve mbi masakrën e Reçakut dhe zbehjen e saj. Prandaj ngjashëm edhe me Gazmend Muhaxherin duhet të merren organet e rendit, dhe të shohin nëse po flet përçart, apo ka ndonjë motiv tjetër që e shtyn të bëjë deklarata të tilla”, ka shkruar Rexhaj në Facebook.
Tutje, ai thotë se njëkohësisht duhet të deklarohet edhe kryetari i LDK-së, Lumir Abdixhiku dhe gjithë subjekti politik, nëse e ndajnë mendimin e njëjtë që sulmi terrorist i Banjskës inskenim.
“Mirëpo njëkohësisht duhet të deklarohet edhe Lumir Abdixhiku dhe LDK-ja, nëse edhe ata e ndajnë mendimin e njëjtë që sulmi terrorist i Banjskës ishte inskenim, apo jo. Gazmend Muhaxheri nuk është çfarëdo personi në LDK, por është nënkryetar i saj”, ka shkruar deputeti i VV-së./teve1.info/
