“Liberalizimi i vizave, realisht ndodhi nga Marrëveshja e Ohrit”, vlerësoi kështu, deputeti nga Lëvizja Vetëvendosje, Arbër Rexha.
Ai tha se kryeministri Kurti i ka hapur rrugën Kosovës për anëtarësim në Organizata Ndërkombëtare.
“Liberalizimi i vizave realisht ndodhi nga Marrëveshja e Ohrit. Pra, mendoj që është çështje e Marrëveshjes së Ohrit. Kjo marrëveshje i përmban pikat për të cilat është nënshkruar. Ne nuk mund ta krijojmë një Republikë Srpska në Kosovë dhe as që do ta bëjmë. Kurti i ka hapur Kosovës rrugë për anëtarësim në mekanizma e Organizata Ndërkombëtare”, deklaroi Rexha në emisionin “Këndi i Debatit”.
Ndërkaq, sa i përket çështjes së Asociacionit, Rexha thotë se nuk kanë marrë ende ndonjë konfirmim nga Gjykata Kushtetuese, se Kosova dhe Serbia duhet të diskutojnë përsëri rreth kësaj teme, përcjell teve1.info.
“Akuza është kështu “e keni mbajtur peng Kosovën shkaku i Asociacionit” dhe tash po del që Asociacionin mund ta krijojë Qeveria. Ndërsa, unë po them që nuk e kemi mbajtur peng Kosovën, përkundrazi, ne e kemi ndalur një marrëveshje komplet të dëmshme, e që i kish tundur themelet e Republikës së Kosovës. Tani jemi duke folur zero me zero për Asociacionin. Ne nuk kemi ndonjë vendim nga Gjykata Kushtetuese për të diskutuar palët, nuk ka kompetenca ekzekutive”, theksoi ai tutje në Tëvë1.
Njëherit, Rexha thotë se në qoftë se Kosova do e krijonte një Asociacion me vullnet të lirë të institucioneve, Serbia përsëri do e kërkonte një tjetër./teve1.info/.
