Për më pak se një orë reshje të shiut, rrugët e kryeqytetit u vërshuan nga uji.
Madje këto reshje shkaktuan edhe qarje të rrugës “Bahri Fazliu, për të cilën të mërkurën u deshtë të intervenohej.
Nga sasia e madhe e ujit, shpërthyen kanalizimet në këto pjesë të Prishtinës.
E gjithë kjo sipas ish- kryeshefit të Agjencisë për Mbrojtjen e Mjedisit, Ilir Morina, po ndodhë për shkak infrastrukturës së dobët.
“Kam mu rrit ballafaqimi me këto në të ardhmen, por jo vetëm në Kosovë por edhe në vendet e tjera, për shkak të ndryshme klimatike. Këto janë procese normale verore, ku re të caktuar të mbushura zbrazen shumë shpejtë, pastaj infrastruktura e dobët që të them i jo rregulluar si duhet vjen që të përmbyten rrugët të krijohen bazën, liqene artificiale, momentale që shkaktojnë shumë probleme”, ka thënë ai për Tëvë 1.
E problem sipas Morinës është edhe sistemi i kanalizimit në kryeqytet.
“Ne kemi disa raste në disa lagje të Prishtinës, ku 7.8 apo 10 rrugë, të gjitha ujërat e tyre shkojnë në një rrugë të fundit, dhe krijohet një fare pellgu lumore dhe në pikë me të ngushte nuk ka lloje të infrastrukturës që mund të përballojë. Për këtë arsye duhet që të disa rrugëve apo rrugica, të ju ndryshohet drejtimi i ujërave në forma të ndryshme”, ka thënë Morina.
Për këtë, eksperti i çështjeve të emergjencave Tahir Ahmeti kërkon nga institucionet të merren më shumë me infrastrukturën nëntokësore.
“Komuna e Prishtinës duhet që krahas ndërtimit që po bënë në kryeqytet të bëjë ndërtimin edhe të infrastrukturës nëntokësore, pasi po shohim sa herë po kemi të reshura, kjo infrastrukture nuk po mund të përballojë këto të reshura dhe po kemi vërshime të ndryshme, dhe duhet që komuna në mënyre periodike të bëjë pastrimin e pusetave, apo ujëmbledhësve në rrugë të ndryshme pasi ato duhet të jenë me funksionale dhe mund të përpijë ujin që po shkaktohet nga të reshurat me të dendura”, shprehet Ahmeti.
Përveç Komunës së Prishtinës edhe disa rrugë në komunën e Fushë Kosovës u vërshuan nga shirat e dendura ditën e djeshme.
