Në këtë gjendje të rënduar u mbajt mësimi para disa ditësh.
Reshjet e shumta të shiut kanë sjellur në këtë gjendje hapësirat e shkollës “Konstandin Kristoforidhi” në Nerodime të Ulët të Ferizajt.
Mësimdhënësit prapa kamerave kanë bërë ankesa se kjo po ua vështirëson atyre punën.
Madje, ata janë detyruar që këtë klasë që ishte e mësimdhënësve ta improvizojnë në një hapësirë për aktivitetet fizike.
Për mungesën e kushteve të punës, ankesa ka edhe punëtori Enver Guta i cili thotë se po iu rrezikohet jeta.
“Është rrezik së pari prej rryme, se mundet në gjysë kalldaja mbushet me ujë, kalldaja në gjysmë mbushet me ujë, është rrezik po na duhet me kry. Shpeshherë jam ardhë me patike, është dashtë me shku në shtëpi me i marrë çizmet për me hy qetu se sun hin, i kem kry punët, t’i kry jem qeshtu… Një herë janë kanë zjarrfikësat, e kanë derdh ujin janë kanë zjarrfikësat, kush nuk u kanë, kush nuk interesohet për këtë punë”, është shprehur Enver Guta – punëtor i shkollës.
Të mllefosur për gjendjen janë edhe prindërit.
Një nga ta tregon se ekziston rreziku edhe për shëndetin e fëmijëve.
“Brenda është tmerr, pikë në tana anët, unë bile kogja me tutë është që kanë me u infektu edhe fëmija, kanë me u sëmurë prej asaj gjendje që është aty, nuk mirret askush, as Drejtoria e Arsimit. Ndoshta drejtori ka bërë kërkesa ose ankesa, s;janë marrë me atë punë, le të japin llogari ata, na e kemi ç shumë gjatë këtë farë pune se është dashtë me u merr me këta, por ne duke menduar se institucionet punojnë edhe mirren me punët e arsimit por veç puna e arsimit është nën nivelin zero” , shprehet Fadil Hajdari – prind.
Tëvë1 ka biseduar edhe me drejtorin e shkollës i cili prapa kamerave ka treguar se ka bërë disa herë kërkesa për intervenim këtë vit, por që nuk është marrë parasysh.
Ndërkaq, as Drejtori i Arsimit në Ferizaj nuk ka pranuar të flasë lidhur me rastin.
