Republikanët në Kongresin amerikan do të bëjnë përpjekjen e tretë për të shmangur mbylljen e Qeverisë amerikane të premten, ndonëse u kanë mbetur vetëm edhe pak orë, meqë dy përpjekjet paraprake kanë dështuar, si pasojë e ndryshimeve të minutës së fundit në legjislacion.
Përfaqësuesi republikan, Ralph Norman, u ka thënë gazetarëve se liderët partiakë planifikojnë të votojnë për një projektligj të tretë të shpenzimeve, ndonëse nuk ka ofruar më shumë hollësi.
Të tjerë kanë thënë se nuk do të tentojnë t’i bindin demokratët, mbështetja e të cilëve është e domosdoshme për të miratuar dokumentin deri në mesnatë.
“Nuk po punojmë me demokratët”, ka thënë përfaqësuesja republikane, Anna Paulina Luna, për agjencinë e lajmeve Reuters.
Nëse Kongresi nuk e miraton paketën e shpenzimeve, fondet për gjithçka, nisur prej departamentit për sundim të ligjit, e deri te parqet kombëtare, do të pezullohen, dhe miliona punëtorë federalë do të jenë në pushim pa pagesë.
Autoritetet kanë paralajmëruar udhëtarët gjatë sezonit të ngarkuar të Krishtlindjeve, se mund të përballen me vonesa të gjata nëpër aeroporte.
Disa burime të Reutersit kanë thënë se Shtëpia e Bardhë i ka alarmuar agjencitë qeveritare që të përgatiten për një mbyllje të shpejtë institucionale.
Qeveria amerikane është mbyllur herën e fundit për 35 ditë, përgjatë mandatit të parë të presidentit të zgjedhur amerikan, Donald Trump, për shkak të disa mospajtimeve për sigurinë kufitare.
Disa media kanë raportuar se republikanët planifikojnë të zhvillojnë disa herë votime për të miratuar elementë të ndryshëm të projektligjit.
Më pas, Dhoma e Përfaqësuesve do të votojë ndaras për miratim të fondeve deri në mars, për fondet për katastrofa eventuale, dhe për ndihmën për bujqit, që skadon në fund të vitit.
Ligjvënësit mund të votojnë edhe për rritje të tavanit të borxhit – një detyrë e vështirë që Trumpi dëshiron që Kongresi ta përfundojë para se të marrë zyrtarisht mandatin më 20 janar, shkruan REL.
Mospajtimet e demokratëve dhe republikanëve lidhen me ndarjet buxhetore, si dhe kërkesën për rritje të tavanit të borxhit, si dhe pas përfshirjes në diskutime online të Trumpit dhe miliarderit Elon Musk, mbështetës i fortë i presidentit në ardhje.
Trump kërkon me ngulm pezullim të tavanit të borxhit për periudhë pesëvjeçare.
Mospajtimet paraprake për tavan të borxhit patën tronditur tregjet financiare.
