Punimet në gjimnazin “Kuvendi i Lezhës” në Viti po vazhdojnë edhe në tetor ani pse është planifikuar që renovimi i objektit të kryhet në muajin maj. Komuna ka pranuar që ka vonesa në punime, ndërsa opozita atje ka akuzuar komunarët për neglizhencë.
Punimet kishin nisur në fillim të këtij viti.
Ani pse ishte premtuar se ato do zgjasnin deri në maj, kjo nuk ndodhi.
Kështu, Gjimnazi “Kuvendi i Lezhës” në Viti është duke u rinovuar edhe gjatë muajit tetor.
Por, drejtori i shkollës Mujë Tafa këtë e arsyeton me faktin që punimet ishin ndërprerë për një kohë.
“Shtyrja në fillim ka qenë kërkesë e jonja sepse ishim në proces të mësimit edukativo-arsimor dhe të nxirren nxënësit nga shkolla për të punuar për t’u rinovuar shkolla, nuk kishte kuptim sepse dukej jo e mirë për nxënësit dmth ishte një situatë krejtësisht tjetër dhe nxënësit të zhvendoseshin edhe u pengojke procesi mësimor”, thotë ai.
Në mungesë të hapësirës, gjimnazistët po vijojnë mësimin në dy objekte tjera shkollore.
“Ka vështirësi sepse nuk i kemi kabinetet të cilat i kemi pasë në Gjimnazin më herët, nuk mundemi me i zhvillu lëndët qysh i kemi zhvillu më herët është pak e vështirë por jemi duke e kaluar sa me pozitivitet” , shprehet nxënësi Andi Zenuni.
Kurse nga Komuna e Vitisë pranojnë që ka vonesa në punime porse theksojnë që renovimet pritet të përfundojnë në nëntor.
“Kemi filluar në korrik me punime për këtë arsye janë vonuar punimet deri tash por punimet janë në përfundim e sipër në nëntor mendoj që do të kryhen punimet, arsyeja pse janë shtyrë punimet është se kemi filluar me vonesë me punime për shkak se nxënësit nuk kemi pasur ku t’i sistemojmë derisa kemi bërë mundësinë me i sistemu në shkolla tjera prej shtatorit, kanë pasë me fillu punimet në shkurt janë shtyrë në korrik” , thotë Zijadin Ahmeti drejtori i Arsimit në Komunën e Vitisë.
Derisa asamblistja opozitare, Liridona Bislimi thotë se ky nuk është rasti i vetëm i neglizhencës së punimeve nga pushteti lokal.
“Natyrisht se për ne këto vonesa dhe këto punime janë të papranueshme e them këtë për faktin se dmth nevojitet një renovim i tërë i Gjimnazit i cili duhet të bëhet në kohë të caktuar, kjo kohë e caktuar ka qenë e prezantuar prej vetë të parit të Komunës së Vitisë që do tëj etë e përfunduar në muajin shtator”, thotë ajo.
Kjo shkollë numëron mbi 800 nxënës, një pjesë e të cilëve aktualisht po e vijojnë mësimin edhe në një shkollë fillore në këtë qytet.
