Ambasada britanike në Kosovë është shprehur e shqetësuar me rënien e Kosovës në Indeksion Botëror të Lirisë së Shtypit gjatë dy viteve të fundit.
Në reagim thuhet se Qeveria e re e Kosovës duhet të mbrojë dhe ruajë fuqinë e institucioneve të saj demokratike ‘duke përfshirë sigurimin e një mjedisi të lirë dhe të respektueshëm për gazetarët’.
Kjo sipas tyre duhet të bëhet edhe duke punuar me mediat dhe organizatat e shoqërisë civile për hartimin e një Ligji të ri për Komisionin e Pavarur të Mediave.
“Jemi thellësisht të shqetësuar nga rënia e Kosovës në Indeksin Botëror të Lirisë së Shtypit të RSF-së gjatë dy viteve të fundit, pas rezultateve të saj më parë mbresëlënëse. Qeveria e re e Kosovës duhet të mbrojë dhe ruajë fuqinë e institucioneve të saj demokratike, duke përfshirë sigurimin e një mjedisi të lirë dhe të respektueshëm për gazetarët për të kryer punën e tyre jetike dhe duke punuar me mediat dhe organizatat e shoqërisë civile për hartimin e një Ligji të ri për Komisionin e Pavarur të Mediave”, thuhet në reagim.
Më tej, ndër të tjera thuhet se një media e lirë dhe e pavarur është një komponent thelbësor i një demokracie të shëndetshme, që çon në stabilitet dhe prosperitet më të madh.
“Një media e lirë dhe e pavarur është një komponent thelbësor i një demokracie të shëndetshme, që çon në stabilitet dhe prosperitet më të madh. Pa aftësinë për të shprehur dhe shpërndarë informacion faktik dhe opinion të lirë, nuk mund të ketë llogaridhënie dhe asnjë diskurs publik të informuar. Në të gjithë botën, ngacmimi i gazetarëve, veçanërisht i grave gazetare, mbetet një sfidë për raportimin e lirë dhe të drejtë”, theksohet në reagim.
Ndryshe, Kosova ka rënë për 24 pozita në renditjen e Indeksit Botëror të Lirisë së Shtypit të cilin e ka publikuar të premten organizata “Reporterët pa Kufij”.
Nga 180 shtete gjithsej, Kosova është renditur e 99-ta, duke mbetur prapa të gjitha vendeve të rajonit, përfshirë Serbinë dhe Shqipërinë.
Ndërkaq, sot më 3 Maj shënohet Dita Botërore e Lirisë së Shtypit që nga viti 1993 nga Asambleja e Përgjithshme e Kombeve të Bashkuara.
Çdo vit kjo datë shënohet për të vlerësuar lirinë e shtypit në botë, për të mbrojtur median nga sulmet ndaj pavarësisë së tyre dhe për të nderuar gazetarët që kanë humbur jetën në ushtrimin e profesionit të tyre./teve1.info/
