Që nga fillimi i luftës në Ukrainë, është përmendur fillimi i një faze të re apo të një “rendi të ri botëror”.
Për këtë çështje, ka folur edhe presidenti i SHBA-së, Joe Biden, i cili ka thënë se do të vijë shumë shpejtë dhe do të udhëhiqet nga Amerika.
“60 milionë njerëz kane vdekur gjatë periudhës 1900 dhe 1946. Që atëherë ne kemi ndërtuar një rend botëror liberal dhe këto ngjarje të tmerrshme janë rralluar. Mund të them që situata tani po ndryshon, mendoj se ka ardhur momenti për një rend të ri botëror që do ta udhëhiqet nga ne”, tha Biden.
Njohësi i çështjeve politike nga Shqipëria, Ben Andoni, thotë se pikërisht Administrata Biden do të jetë ajo që do të vendos themelet e këtij rendi të ri botëror.
“Do të marri përsëri në kohën e presidencës së tij të nisin përpjekjet që të krijohen institucione të reja ose më saktë të reformohen institucionet e reja, që do të thotë një Kartë e re Kombeve të Bashkuara, që do të thotë institucionet të gjitha, të gjitha marrëveshjet ndërkombëtare të rishikohen po mbi interesat e Shteteve të Bashkuara të Amerikës unë besoj që kjo do të jetë jashtëzakonisht e vështirë”,tha Andoni.
Politologu Dritëro Arifi, thotë se Kosova dhe Ballkani Perëndimor do të jenë në interes të perëndimit, kur të definohen zonat e interesit në këtë rend të ri.
“Rendi i ri botëror që po imponohet nga Rusia duhet të shikohet me kujdes edhe në Ballkan se si mund të definohen ato zonat e influencës të fuqive të mëdha … dhe mendoj që Ballkani po mundohet që të jetë mbi apo nën zonën e influencës së SHBA-ve, apo botës perëndimore … për fat të mitë të tonin, kombi shqiptar nëse e shohim si komb por edhe si Republika e Kosovës është rreshtuar në anën e botës demokratike. Andaj tash mbetet të shihet se si po rrjedhin gjërat por besoj që në interes të SHBA-ve është i gjithë Ballkani perëndimor”, tha Arifi.
Rendi aktual botëror, që siç po duket i ka ardhur fundi, ka filluar së funksionuari pas përfundimit të luftës së dytë botërore.
Raporti i gazetarit Valmir Gallopeni.
