Paris Saint-Germaini, me barazimin e mbrëmshëm 1:1 në shtëpi të Nantes, e theu rekordin e Milanit të vitit 1993, i cili në atë kohë udhëhiqej nga Arrigo Sacchi.
Ai ekip ëndrrash në fakt ishte ndalur në kuotën e 38 ndeshjeve radhazi pa humbje në udhëtim.
Kjo është një arritje historike, që i përfshin pesë ligat më të forta evropiane, pasi askush nuk ka bërë më mirë se trupa e udhëhequr nga Luis Enrique.
Asnjë humbje deri në këtë moment për parisienët, të cilët e festuan tashmë titullin e kampionit falë 24 fitoreve e 6 barazimeve të regjistruara, përfshirë këtu 83 gola të shënuar, statistika këto të pakapshme për Marseillen dhe për Monacon.
Gjithçka nisi nga humbja në Monaco më 11 shkurt të vitit 2023 (1:3), ndërsa nga ajo kohë ekipi nga “Parku i Princave” nuk di se çka është humbja në 39 ndeshje radhazi në udhëtim në Ligue 1, përfshirë këtu 30 fitore e 9 barazime.
Praktikisht dy vjet e më shumë se dy muaj pa humbur.
“Në fillim nuk ishte një objektiv, por po përmirësohemi dhe kjo është mjaft pozitive”, deklaroi trajneri Luis Enrique për “DAZN”, duke e komentuar këtë arritje historike të ekipit të tij.
