Pavarësisht peshës historike, jeta e Adem Jasharit, nuk u kthye kurrë në film.
Përgatitjet për këtë të fundit, kishin filluar para disa viteve.
E gjitha kjo, me iniciativën e regjisorit, Luan Kryeziu.
“Filmi është në proces, por merr shumë kohë, ka përgjegjësi të madhe historike. Ne 90%, mos të them 100%, të bashkëpunëtorëve të tij i kemi intervistuar, madje ka raste kur jemi takuar bashkë në oda më bashkëluftëtarë, ne e dimë çdo detaj, por më nuk është faji jonë, ne tashmë presim…”, thotë Kryeziu për Tëvë 1
E pengesë për realizimin e filmave të kohës së luftës, sipas regjisorëve, po del të jetë vet shteti i Kosovës.
Kryeziu ka treguar se me çka ballafaqohen kur aplikojnë për projekte të tilla në Qendrën Kinematografike të Kosovës.
“Çdoherë që unë kam aplikuar në Qendrën Kinematografike me temat të luftës dhe asnjëherë nuk kalojnë ato tema, për shkak se gjithmonë arsyetimi ka qenë që po nxitim urrejtje ndëretnike, ambasadat s’po lejojnë, madje edhe ministrat kanë thënë që mos me u trajtuar..”, thotë ai.
Ndërkohë situatë krejt tjetër, është në shtetin serb.
Radio Televizioni i Serbisë, së fundmi ka realizuar edhe dokumentarin me titullin “Shtëpia e Verdhë”, të bazuar në raportin e senatorit zviceran, Dick Marty.
Ndërsa shuma të mëdha parash kishte ndarë edhe për filmin tjetër për Betejën e Koshares, i cili ka arritur në 7.4 milionë shikime.
Por, çfarë synon shteti serb përmes këtyre filmave tregon regjisori, Fadil Hysaj.
“Derisa nuk ka tregime të krimit të secilit prej tyre në Kosovë, dhe ato tregime nuk kanë hapësirë më së pari në Kosovë dhe pastaj në nivel ndërkombëtarë, atë herë kemi një lloj balance se çfarë e kemi sot, që gënjeshtra serbe për luftën është shumë më e pranishme në botë sesa e vërteta shqiptare”, thotë ai.
Edhe regjisori, Fadil Hysaj thotë se po mungon përkrahja shtetërore për realizimin e filmave të kohës së luftës.
“Mendoj që ka munguar një lloj vullneti politik që më u marrë me krimet e luftës të Serbisë në Kosovë, më shumë jemi marrë me glorifikimin e luftës së Ushtrisë Çlirimtare të Kosovë, që edhe kjo nuk ka të keqe”, shprehet Hysaj.
Tëvë1 ka pyetur në Qendrën Kinematografike të Kosovës, se pse nuk po lejon projekte të tilla.
Por pavarësisht pritjes, këta nuk kanë kthyer përgjigje.
Kronika e realizuar nga gazetari Fidan Zejnullahu