Kërkesa e Lëvizjes Vetëvendosje, lidhur me anulimin e rezultateve të votimin me postë dhe përsëritjen e votimit është refuzuar nga Paneli Zgjedhor për Ankesa dhe Parashtresa si e pas afatshme.
Në vendim thuhet se LVV-ja parregullsitë e cekura ka mundur t’i paraqes në momentin kur i ka kuptuar ato.
“Paneli gjeti se pretendimet e paraqitura për këtë çështje janë të parashtruara pas afatit ligjor për ankimim, pasi që pala ankuese këto parregullsi ka mundur t’i paraqes në momentin kur ka kuptuar per shkeljet e tilla ashtu siç parashihet me nenin 10 dhe 98 të LZP-së”, thuhet në vendimin e PZAP-së.
Ndërkaq, ankesa tjetër e LVV-së lidhur me rinumërimin e 1,631 votave të shpallura si të pavlefshme nga votimi nga jashtë vendit është pranuar nga PZAP-ja.
“Anulohet vendimi i KQZ-së, numër 01687-2025, datë 06.03.2025, urdhërohet Komisioni Qendror i Zgjedhjeve (KQZ), respektivisht Qendra e Numërimit dhe Rezultateve (QNR) sipas rekomandimit të Sekretariatit të KQZ-së të datës 06.03.2025 të bëjë hapjen e 177 kutive të votimit, më 1631 fletëvotime të pavlefshme, të dërguara nga votuesit jashtë Kosovës në kutitë postare të KQZ-së, të njëjta fletëvotime të rivlerësohen, të numërohen, dhe të përfshihen në rezultatin përfundimtar”, thuhet në vendimin e PZAP-i.
