Çdo mbrëmje, në disa shtëpi të Podujevës rubineti mbyllet për orë të tëra.
E me këtë problem, banorët si duket tashmë janë mësuar.
Kjo pasi, ndërprerjet e ujit janë bërë të zakonshme për ta.
Sejdi Kuleta është njëri prej të prekurve nga kjo gjendje.
“Ujë prej 07:00 deri të nesërmen në ora 06:00 nuk kena ujë, nuk e di pse po e nalin kur ka ujë boll ne prej bunareve e marrim ujin, knej dalin kishe po e ndreqin veç po e prishin më fort”, thotë ai.
Ankesat, sipas banorëve, mbesin pa përgjigje.
“Pa ujë vështirë është boll unë e kom motorrin po dikush dikush që ska hiç ujë as nëpër banesa nuk ka. Po marrim ujë për dy ditë tri ditë rezerva. Bon ankesa badihava s’ki ku bon ankesë, shko në Prishtinë na kthejnë në Podujevë. Edhe për pije po duhet me ble ujin kur po nalet, e për me u pastru me pompë”, thotë banori.
Kuleta thotë se metër kubiku paguhet një euro, edhe kur uji nuk vjen fare.
“Me pagu 1 euro një kubik ujë e mos me pasë ujë kjo për shtet është marri. Çmimi i ujit ka 1 euro, unë për veti qeshtu e paguj, ata nuk e qelin orën hiç me e ndreq me kqyr edhe veç qashtu ta llogaritin edhe hajt shko paguje”.
Edhe banorë të tjerë të cilët nuk pranuan të dalin para kamerës i thanë televizionit që kjo gjë po bëhet edhe më e vështirë tani gjatë muajit të Ramazanit.
Për këtë situatë, kryetari i komunës Shpejtim Bulliqi, në një konferencë për media, dha arsyet e ndërprerjeve të shpeshta të ujit në këtë komunë.
“Konfiguracioni i terenit është pak më i ngritur në raport me pjesët tjera dhe normal kur nuk ka furnizim të mjaftueshëm, gypi kryesor që vjen në Podujevë normal aty bjen niveli i ujit dhe paraqiten reduktim. Mund të jenë reduktime pak me të shprehura për shkak të lartësisë mbidetare por që është në vazhdën e krejt reduktimeve që janë bë. Dhe nuk qëndron fakti që ka me muaj të tërë pa ujë por ka vetëm reduktime siç ka edhe në kryeqendrën e Kosovës është takimi i tretë qe e kemi realizu me KRU Prishtina”.
Bulliqi hodhi poshtë gjithashtu edhe gjitha aludimet lidhur me përhapjen e zgjebës në një pjesë të kësaj komune, duke treguar se pas inspektimeve në terren, nuk ka rezultuar ndonjë rast.
Kronikë e realizuar nga gazetarja Jona Kelemendi.
