Rodgygo ka shkëlqyer, derisa Real Madridi ka shënuar tjetër fitore ndaj Chelseat për të bërë vend në gjysmëfinale të Ligës së Kampionëve.
Pas fitores 2:0 në “Santiago Bernabeu” një javë më parë, Madridi të martën mbrëma fitoi 2:0 edhe në “Stamford Bridge”, në ndeshjen e dytë të çerekfinales. Me rezultatin e përgjithshëm 4:0, madrilenët kanë zënë vend në gjysmëfinale të Championsit, fazë ku paraqiten rregullisht.
Rodrygo në pjesën e parë goditi shtyllën, ndërsa sfidën në Londër e vendosi në pjesën e dytë.
Braziliani 22-vjeçar shënoi për 1:0 në minutën e 58-të, pas një aksioni të bukur të Madridit. Asistues ishte Vinicius Junior.
Golin e dytë, Rodrygo e shënoi në minutën e 80-të. Sërish kampioni evropian realizoi aksion të bukur, ku ishin të përfshirë edhe Vinicius Junior e Federico Valverde. Rodrygo thuajse hyri me top në portë për të kompletuar debaklin e Chelseat në Champions. Në gjysmëfinale, Real Madridi takohet me Manchester Cityn apo Bayernin.
Ndërkaq biletë ka siguruar edhe Milani, e cila i ka mbijetuar sulmeve të Napolit për t’u kualifikuar në gjysmëfinale të Ligës së Kampionëve pas një kohe shumë të gjatë.
Të martën mbrëma në stadiumin “Diego Armando Maradona” në Napoli, Milani e Napoli barazuan me rezultatin 1:1. Kështu vendimtare doli të jetë fitorja e arritur në “San Siro”, javën e kaluar. Milani kishte fituar 1:0 në shtëpi dhe me rezultatin e përgjithshëm 2:1 kalon në gjysmëfinale.
Të martën, golin për Milanin e shënoi Olivier Giroud në minutën e 43-të. Por meritat për golin i kishte Rafael Leao. Ai vrapoi mbi 60 metra, kaloi dy lojtarë të Napolit dhe shërbeu Giroudin.
Fare në fund, në minutën e 93-të, Victor Osimhen shënoi për rezultatin 1:1. Por ky rezultat nuk ishte i mjaftueshëm për skuadrën e Amir Rrahmanit. Rrahmani luajti deri në minutën e 74-t, ndërsa u kalua nga Leao gjatë atij vrapimi të veçantë.
Giroud humbi penallti për Milanin në minutën e 22-të, ndërsa nga pika e bardhë dështoi edhe Kvara i Napolit, në minutën e 82-të.
