Real Madridi është befasuar në fund të ndeshjes të shtunën pasdite. Reali u mposht nga Valencia me rezultatin 2:1 në ndeshjen që i takoi javës së 30-të të La Ligas. Skuadra e “Los Blancos” u mposht me gol të minutës së 95-të.
Fillimisht sulmuesi brazilian, Vinicius Junior, e kishte mundësinë që ta kalonte në epërsi Realin në minutën e 13-të, por ai humbi penalltinë.
Kjo i kushtoi Realit, pasi dy minuta më pas Mouctar Diakhaby, e kaloi në epërsi Valencian.
Vinicius pavarësisht se e humbi penalltinë, i barazoi shifrat në minutën e 50-të.
Pas një kundërsulmi të shpejtë krejt në fund të ndeshjes, Hugo Duro, e realizoi golin e fitores për Valencian.
Realit iu anulua edhe një gol në minutën e 21-të për shkak të pozitës jashtë loje.
Me këtë humbje, Reali, ka bërë hap prapa në garën për titull kampioni në Spanjë. Renditet në pozitën e dytë me 63 pikë. Lidere është Barcelona që do të luajë me Betisin në ndeshjen e mbetur të shtunën më vonë.
Valencia ka 34 pikë në pjesën e poshtme të tabelës.
