Real Madridi ka mbetur për një periudhë pa mesfushorin Eduardo Camavinga, kanë njoftuar të enjten mediumet spanjolle.
Shkaku i lëndimit të pësuar të martën në stërvitje, Camavinga do të pauzoj të paktën 2 muaj dhe sipas mjekëve pritet të rikthehet në fushë në fund të muajit tetor.
Në stërvitjen e fundit para ndeshjes me Atalantan në kuadër të Superkupës së Evropës, Camavinga e lëndoi rëndë gjurin.
Ekzaminimet kanë konstatuar se francezit i duhet kohë për t’u rikuperuar dhe mungesa e tij në fillim të sezonit të ri, do të ndihet te Real Madridi.
Shkaku i lëndimit, Camavinga pritet t’i humb 11 ndeshje, 9 në La Liga dhe 2 tjera në Ligën e Kampionëve.
Po ashtu, ai i mungoi Realit edhe në fitoren ndaj Atalantas në Varshavë, ku ekipi spanjoll triumfoi për herën e gjashtë trofeun e Superkupës së Evropës.
