Real Madridi dhe Real Sociedadi do të përballen sonte në ndeshjen kthyese të gjysmëfinales së Kupës së Mbretit, e cila do të zhvillohet në stadiumin “Santiago Bernabéu” në orën 21:30. Në ndeshjen e parë, “Los Blancos” siguruan një fitore minimale 0-1 falë golit të Endrick në minutën e 19-të, duke u afruar kështu një hap më pranë finales së kompeticionit.
Trajneri Carlo Ancelotti po përballet me një kalendar të ngjeshur, me pesë ndeshje brenda 15 ditëve, dhe disa mungesa të rëndësishme në mbrojtje, përfshirë Daniel Carvajal, Eder Militao, Ferland Mendy dhe mesfushorin Dani Ceballos, të cilët janë të dëmtuar.
Megjithatë, Ancelotti mbetet i motivuar për të arritur finalen dhe për të synuar trofeun e tretë të Kupës së Mbretit në karrierën e tij si trajner i Real Madridit.
Nga ana tjetër, Real Sociedadi, nën drejtimin e trajnerit Imanol Alguacil, synon të përmbysë disavantazhin dhe të sigurojë një vend në finalen e Kupës.
Përballja e sotme pritet të jetë e fortë dhe emocionuese, me të dyja skuadrat që do të luftojnë për një vend në finalen e Kupës së Mbretit.
