Presidenti amerikan, Donald Trump ka kritikuar presidentin rus, Vladimir Putin pas sulmit të fundit vdekjeprurës në Kiev duke i thënë, “Ndalu!”
“Unë nuk jam i kënaqur me sulmet ruse në KYIV. Jo e nevojshme dhe koha shumë e keqe. Vladimir, STOP! 5000 ushtarë në javë po vdesin,” ka thënë Trump në një postim në platformën e tij “Truth Social”. “Le ta përfundojmë Marrëveshjen e Paqes!”
Rusia goditi Kievin me një breshëri disa orëshe raketash dhe dronësh. Të paktën 10 njerëz u vranë dhe 90 u plagosën, raporton AP.
Zhgënjimi i Trump po rritet pasi një përpjekje e udhëhequr nga SHBA për të arritur një marrëveshje paqeje midis Ukrainës dhe Rusisë nuk ka bërë përparim.
Trump do të takohet më vonë të enjten me kryeministrin norvegjez, Jonas Gahr Støre për të diskutuar luftën në Ukrainë, tarifat e SHBA-së dhe çështje të tjera.
Gahr Støre tha në një postim në mediat sociale të enjten se ai do të nënvizonte gjatë bisedimeve se “kontakti i ngushtë midis Norvegjisë dhe SHBA-së është vendimtar”.
“Ne duhet të kontribuojmë për një paqe të qëndrueshme dhe të drejtë në Ukrainë,” tha ai.
Shtëpia e Bardhë ka njoftuar të martën se i dërguari special i Trump, Steve Witkoff, do të vizitojë Moskën këtë javë për një raund të ri bisedimesh me Putinin rreth luftës. Ky do të ishte takimi i tyre i katërt që kur Trump mori detyrën në janar.
