Objekti i Postës së Kosovës në Komunën e Zveçanit është sulmuar me dy granata dore, mëngjesin e sotëm.
Ky rast është cilësuar sulm terrorist nga kryetari i kësaj komune, derisa nga Policia e Kosovës kanë bërë të ditur se janë duke realizuar hetime.
Lidhur me këtë ngjarje, ka reaguar edhe vetë Posta e Kosovës, e cila ka theksuar se asnjë sulm nuk do të ndikojë në angazhimin e saj për të ofruar shërbime cilësore dhe se punën do ta vazhdojnë pa ndërprerje.
Posta e Kosovës e ka cilësuar këtë akt si një “krim” dhe ka kërkuar një hetim të plotë të rastit nga autoritetet kompetente, duke kërkuar gjithashtu që ata që janë përgjegjës të përballen me drejtësinë.
“Njoftojmë qytetarët se në këtë qytet vazhdon të jetë funksionale edhe zyra postare Zveçan-1, e cila ndodhet në objektin e komunës. Falënderojmë Policinë e Kosovës për reagimin e shpejtë dhe profesional. Së shpejti edhe zyra postare Zveçan-2 do t’u rikthehet në shërbim qytetarëve”, thuhet në reagimin e postës./teve1.info/
