Certifikuesi Enver Hajrullahu, që punon në Ministrinë e Tregtisë dhe Industrisë, i cili dëgjohet në bisedat mes zyrtarëve të kësaj ministrie, të cilat i ka publikuar Gazeta Nacionale, ka reaguar për këtë rast.
Ai përmes një postimi në Facebook, ka thënë se bisedat nuk kanë rrjedhur nga ai dhe se nuk ka qenë në dijeni që kjo bisedë e zhvilluar në njërën nga zyrat e Departamentit të Financave, ka qenë duke u incizuar.
Ai thotë se nuk ka pasur qëllime kundër asnjë zyrtari, vetëm se ka respektuar rregullat.
“Sot, është publikuar një video në mediumin Nacionale.com, si protagonist i asaj video jam Unë. Dua t’iu njoftoj se këto audio-incizime nuk kanë rrjedhur nga Unë, dhe i njëjti është bërë në hapësirat e MINT përkatësisht në njërën nga zyrat e Departamentit të Financave, duke mos qenë në dijeni që po ndodh një incizim i tillë, dhe Unë nuk jam burim i mediumit në fjalë. Kjo bisedë ka ndodhur përafërsisht në fund të korrikut të vitit 2022. Me përgjegjësinë më të lartë morale dhe profesionale deklaroj se nuk kam patur kurrfarë qëllimi kundër asnjë zyrtari, por jam kujdesur për t’i respektuar procedurat ligjore”, ka shkruar ai, përcjell teve1.info
