Prokuroria Speciale e Kosovës, ka njoftuar se ka ngritur aktakuzë ndaj gjashtë personave me dyshimin se kanë kryer veprën penale “Shpëlarja e parave”, nga viti 2015 deri në vitin 2023.
E.K, Xh.Xh., A.H., R.B., M.V. dhe F.T dyshohen për këtë vepër, ndërsa E.K. dhe M.V. edhe për veprën penale në bashkëkryerje “falsifikim i dokumenteve”.
“Prokuroria Speciale e Republikës së Kosovës, ka ngritur sot aktakuzë në Gjykatën Themelore në Prishtinë – Departamentin Special, kundër të pandehurve E. K, Xh.Xh, A.H, R.B, M.V dhe F.T, pasiqë ekziston dyshimi i bazuar mirë se të njëjtit kanë kryer veprën penale të kryer në bashkëkryerje dhe në vazhdimësi nga viti 2015 deri në vitin 2023 , “Shpëlarja e parave”, e përcaktuar me nenin 308, lidhur me nenin 31 dhe 81 të KPRK-së dhe nenin 56 par. 1 pika 1.6 të Ligjit për parandalimin e pastrimit të parave dhe luftimin e financimit të Terrorizmit”, thuhet në njoftimin e Prokurorisë Speciale.
Gjithashtu në këtë njoftim bëhet e ditur se vlera pasurisë së sekuestruar në këtë rast është 1,629,929.77 Euro, shumë kjo të cilën Prokuroria i ka propozuar Gjykatës që ta konfiskojë. /teve1.info
