Rasti në Badoc – Polici që plagosi dy qytetarë sipas IPK-së momentalisht mbetet në cilësinë e dëshmitarit

E inspektorati Policor i Kosovës ka njoftuar se në lidhje me këtë rast Prokurori i Shtetit ka udhëzuar që zyrtarit policor Sh.E, në këtë fazë të hetimit të mbetet në cilësinë e dëshmitarit dhe rasti të hetohet nga Policia, në koordinim me hetuesit e IPK-së dhe Prokurorit të Shtetit, raporton teve1.info

Ndërsa ndaj dy qytetarëve të dyshuar të përfshirë në incident do të hapet rast penal, nën dyshimin për kryerjen e veprave penale “Shkaktim i rrezikut të përgjithshëm dhe Armëmbajtje pa leje”, por që rasti do të procedohet në procedurë të rregullt derisa ata të shërohen.

“Prokurori i Shtetit ka udhëzuar që në ketë fazë të hetimit të hapet rast penal ndaj dy qytetarëve të përfshirë në këtë rast, nën dyshimin për kryrjen e veprave penale Shkaktim i rrezikut të përgjithshëm dhe Armëbajtje pa leje, dhe rasti të procedohet në procedurë të rregullt, derisa të përmirësohet gjendja shëndetsore e personave të plagosur dhe të njëjtit do të monitorohen nga policia. Ndërsa zyrtari policor Sh.E, në këtë fazë të hetimit mbetet në cilësinë e dëshmitarit dhe rasti do të hetohet nga Policia e Kosovës, në koordinim me hetuesit e IPK-së dhe të Prokurorit të Shtetit”, thuhet në njoftimin e IPK-së.

Kujtojmë, që më 1 maj te liqeni i Badocit, në fshatin Mramor të Prishtinës ka ndodhur një incident ku janë përfshirë një zyrtar policor dhe dy qytetarë, ku derisa zyrtari policor kishte qenë në piknik me shoqërinë e tij ishte përfshirë në një shkëmbim me armë zjarri me dy qytetarë të armatosur, zyrtari policor ka plagosur dy persona të cilët dyshohet se kanë sulmuar atë dhe shoqëruesit e tij që gjendëshin së bashku me të në piknik./teve1.info